2月 01 2017
3種妳必須提防的防腐劑 (上) - 防腐劑篇(一) | Dr. Koala
無論一般嘅護膚品，定係天然護膚品，每當我地研究產品成份時，好多時候都會係最後見到一抽水蛇春咁長嘅化學名字，無錯，佢地就係防腐劑啦!
護膚品中嘅防腐劑主要針對三個問題: 防止黴菌或真菌，細菌和酸敗(rancidity)。令產品能夠有較長保質期。
防腐劑是必要嗎?
絕大部分情況下，我可以答妳，必要!!
係好多天然護膚品入面，都會加入對肌膚有益嘅植物活性成份同其他天然營養，呢啲固然對皮膚有莫大益處，但同理，亦會養活其它微生物，諸如細菌、黴菌及真菌。如果無咗防腐劑嘅話，天然護膚品就會變得極容易變質，因搽上變質護膚品傷害皮膚嘅風險可能仲危險!
有啲防腐劑效能超強，如果要為保質期加上一個期限，落得多，絕對可以係一萬年，因為佢地黴菌、真菌、細菌無所不殺，但亦包括妳嘅肌膚﹗﹗That’s why 好多國外設廠嘅跨國大品牌都會用呢啲防腐劑，以降低生產成本及應付長時間嘅船運，無他嘅，賺多啲錢嘛。
其實防腐劑都有好有唔好，用得啱，用量恰當，可以守護妳嘅肌膚，反之，將會毒害妳嘅肌膚，3種最必須提防嘅防腐劑入面，今集我會先為大家介紹最具爭議嘅 - Paraben。
第一種: 對羥基苯甲酸酯類/尼泊金酯（Parabens）
最常見的6種包括:
對羥基苯甲酸甲酯（Methyl paraben）
對羥基苯甲酸乙酯（Ethyl paraben）
對羥基苯甲酸丙酯（Propyl paraben）
對羥基苯甲酸丁酯（Butyl paraben）
對羥基苯甲酸異丙酯（Isopropyl paraben）
對羥基苯甲酸異丁酯（Isobutyl paraben）
佢地對於細菌、酵母菌及黴菌都有廣泛嘅抑制效果。歐盟單一濃度上限為0.4%，其中丙酯(Propyl paraben)及丁酯(Butyl paraben)上限為0.14%
Parabens嘅健康風險
- 加速皮膚老化
有研究指出，係日光暴露下，Parabens係皮膚上會與UVB反應，加速皮膚老化和破壞DNA
- 雌激素活動 (Estrogenic activity)
有實驗總結出對羥基苯甲酸酯有微弱嘅雌激素活動，如同仿雌激素(Xenoestrogens)
- 乳癌風險
一個由Dr Philippa Darbre係2004年領導嘅研究指出，Parabens與乳癌有確實關係。儘管如此，暫時仲未有證據證明Parabens同乳癌的因果關係。
- 過敏反應
Parabens對正常膚質嘅人大多數唔會造成刺激同敏感，但對少數有Parabens過敏嘅人卻會刺激皮膚，甚至導致刺激性皮膚炎和酒槽鼻
Parabens在天然中存在，但仍須提防
其實有研究開防腐劑嘅朋友仔應該都會知，甲酯（Methyl paraben）同乙酯（Ethyl paraben）係好多植物中天然存在，例如藍莓、胡蘿蔔、橄欖、草莓等等，何以見得Parabens有危險?因為所含嘅濃度大不同，例如係藍莓中只有0.003%不到嘅濃度，而應用係護膚品中，卻可以去到0.4%。
而真正妳需要提防嘅係，當妳用緊嘅大部分護膚品都用Parabens做preservatives嘅時候，妳一日累積嘅吸入量就唔簡單，日復一日，風險可想而知。
既然有其它更安全嘅防腐劑，何必冒險呢?
了解更多健康肌膚之道：
![[Dr. Koala 成分小學堂] 果酸(AHA) - 四大換膚功效](http://www.drkoalahk.com/cdn/shop/articles/25_large.jpg?v=1658243989)
![[Dr. Koala 成分介紹] 柳樹皮 - 天然暗瘡剋星](http://www.drkoalahk.com/cdn/shop/articles/Dr._Koala_large.jpg?v=1658294632)
![[Dr. Koala 產品分析] Juice Organics 有機椰子修護洗髮乳](http://www.drkoalahk.com/cdn/shop/articles/Dr._Koala_Juice_Organics_large.jpg?v=1658244128)
